Áhugavert
Ofurfæði
- enn ein vitleysan, eða hvað?
Mörg okkar eru búin að fá nóg af endalausum predikunum um lausnir sem eiga að duga til að gera okkur hamingjusöm, grönn og falleg með lágmarks fyrirhöfn. Þetta eru alls kyns megrunarkúrar, hreinsanir, afeitranir o.s.frv. Við á Gestgjafanum höllumst að þeim einföldu sannindum að þegar öllu er á botninn hvolft sé það skynsemin sem segi okkur hvernig best sé að haga lífi okkar til að viðhalda heilsu. Hún segir okkur að það sé betra að borða hollan mat en óhollan. Öll ráðin koma auðvitað til af því að við höfum of oft val um fæði sem inniheldur ekki nógu mikla næringu og látum freistast. Þar má nefna skyndifæði.
Nú vitum við að sumar fæðutegundir gefa okkur meira af næringarefnum en aðrar. Af hverju þá að leggja sér til munns eitthvað annað en það sem flokkast undir „ofurfæði“? Svarið er sennilega af því að lífið er leiðinlegra með slíkum boðum og bönnum. Við verðum að geta brugðið út af og borðað af og til það sem við vitum að er á svarta listanum án þess að fá samviskubit. Þá lærum við smátt og smátt að njóta enn frekar þess sem gerir líkama okkar augljóslega gott. Okkur hefur lærst að öll „fanatík“ sé af hinu vonda. Við munum alltaf falla í einhverjar gildrur og þá er betra að gera það stundum en fara samt allajafna eftir þeirri meginreglu að neyta hollrar og næringarríkrar fæðu. Ofurfæðislistinn er reyndar svo fjölbreyttur að það er enginn vandi. Í þessu tölublaði förum við nýja leið og sýnum ykkur hvernig hægt er að taka nýjungar inn í fæðið en gefa samt engan afslátt á bragðgæðunum. Og það kemur eflaust mörgum á óvart hversu einfalt það er.
En hvað er þetta „ofurfæði“. Orðabækur segja það vera mat sem er sérlega næringarríkur eða að öðru leyti jákvæður fyrir heilsu okkar og vellíðan. Við tókum David Wolfe tali en hann er einn af þeim sem hefur tileinkað sér ofurfæði sem lífsstíl. Hann segir einfaldlega að ofurfæðið sé samansafn af fæðutegundum sem gengnar kynslóðir hafa komist að því að séu hollari en aðrar. David Wolfe hefur sætt gagnrýni eins og margir þeirra sem sakaðir eru um að reyna að gera sér pening úr trúgirni almennings sem er oft trúgjarn með afbrigðum. En þegar öllu er á botninn hvolft tekur hver og einn ákvörðun byggða á eigin skynsemi um það hverju við trúum og í hvað við eyðum peningunum okkar. Við sýnum ykkur í þessu tölublaði hvernig hægt er að taka inn í daglega fæðu sumt af því sem forfeður okkar fundu út að gerir líkamanum gott. Sumt hefur núna verið vísindalega sannað að er rétt. Annað tökum við trúanlegt af því að gengnar kynslóðir þrifust vel á þessu fæði.
Gangi ykkur vel að tileinka ykkur nýjungarnar!
Sólveig og Guðrún
- Úr 1. tölublaði Gestgjafans árið 2010.
