Útgáfa
Drottnar auðsins og drottnar þjóðfélagsins
Misskipting auðs og valda er nokkuð fyrirferðarmikil í þessu tölublaði Sögunnar allrar, einhverra hluta vegna. Hrói höttur stal frá ríkum og gaf fátækum um leið og hann barðist gegn Jóhanni landlausa fyrir konung sinn, Ríkharð ljónshjarta. Kannski hvarflaði aldrei að Hróa að Ríkharður væri ekki heiðursins verður. Hann var Englandskonungur í áratug, dvaldi þar af einungis sex mánuði í landinu, talaði ekki tungu heimamanna og það var hann sem lagði ofurskatta á Englendinga til að fjármagna krossferð sína, ekki Jóhann, bróðir hans, landlausi.
Þó skal minnt á að Hrói höttur er þjóðsagnapersóna sem þó er fótur fyrir.
Fyrir um 2.600 árum gekk á með róstum og uppþotum, ef ekki borgarastyrjöldum, í fjölda grískra borgríkja vegna efnahagsástands og valdamismunar. Sums staðar enduðu ósköpin með harðstjórn en Aþeningum tókst að fá yrkjandi kaupmann, Sólon að nafni, til að setja sér ný lög og stjórnarskrá án valdbeitingar og blóðsútláta. En Sólon gróf ekki nógu djúpt eftir rótum vandans, lög hans dugðu Aþeningum í nokkra áratugi en síðan tók harðstjóri við. Ásættanlegur að vísu en harðstjóri, tyrannos. Með tiltekt sinni í Aþenu lagði Sólon þó grunninn að lýðræði Grikkja og okkar nútímamanna.
Rómaveldi birtist okkur í tveimur væntanlegum kvikmyndum um örlög níundu herdeildar og þeim einvöldum heimsveldsins forna sem skærast hafa skinið í kvikmyndum og sjónvarpi en hér heima segir af friðsömum og vinsælum lækni sem varð fórnarlamb Sturlungaaldar. Ekki má þá gleyma fornaldarfangelsum, Sovétnjósnara, Prússakonunginum hugumstóra og aulum með foringjatign.
Eitthvað fyrir alla – góða skemmtun!
