„Viltu lofa mér því …“

Kolfinna Nikulásdóttir hefur getið sér gott orð á hinum ýmsu sviðum í gegnum tíðina, en hefur nú fundið sinn heimavöll í leikhúsinu. Hún á rætur að rekja bæði til Puerto Rico og Frakklands og það var í Frakklandi sem hún sleit fyrstu pörunum af barnsskónum. Sjö ára flutti hún á Grettisgötuna og miðborgin varð hennar vígvöllur og ævintýraheimur fram á fullorðinsár. Þar fikraði hún sig eftir húsþökum sem barn, skipulagði mótmæli sem unglingur og djammaði fram undir morgun á menntaskólaárunum. Þar lagði hún einnig stund á listnám þegar hún var orðin fullorðin á meðan lífið leiddi hana um ólgusjó áfalla og upplifana. Í dag er hún framsæknasti leikstjóri sinnar kynslóðar, með skarpa sýn á formið og óttalausa rödd sem talar bæði inn í samtímann og á móti honum. Um þessar mundir tekst hún á við Hamlet í Borgarleikhúsinu og er staðráðin í því að færa landsmönnum mest lifandi sviðsverk íslenskrar leiklistarsögu.