Ástin kom aftan að mér

Segja má að ástin hafi óvænt læðst aftan að mér þegar ég var algjörlega búin að gefa hana upp á bátinn. Í dag er líf mitt fyllra og gleðilegra vegna þess að hann gafst ekki upp og leyfði mér ekki að komast undan. Ég hóf sambúð með Jóa tuttugu og fimm ára. Við höfðum þá þekkst í þrjú ár og töldum okkur hafa fundið framtíðarmaka hvort í öðru. Sambandið entist hins vegar aðeins í sjö ár. Hann hafði á margan hátt önnur viðhorf til lífsins en ég og kannski má orða það þannig að við hefðum vaxið hvort frá öðru.