Gleraugnatískan er jafn síbreytileg og hver önnur en gleraugu eru oft dýr fjárfesting og kannski ekki eitthvað sem við endurnýjum jafn auðveldlega og flíkurnar í skápnum. Það getur því verið gott að velja klassískan stíl sem fer aldrei úr tísku, en það er þó freistandi að leyfa sér að prófa ný trend sem eru kannski aðeins út fyrir kassann. Í ár eru alls konar umgjarðartýpur áberandi og það ættu öll að geta fundið eitthvað við sitt hæfi. Við sjáum, eða sjáum ekki, gegnsæjar umgjarðir, ávöl gleraugu – bæði kringlótt og sporöskjulaga, og gleraugu í laginu eins og kattaraugu. Þunnar málmumgjarðir eru að koma sterkar inn sem og hin sívinsælu flugmannagleraugu og ekki skemmir fyrir þegar þau eru skyggð og í yfirstærð.
Texti: Steinunn Jónsdóttir
Myndir: Frá söluaðilum og af vef
