Kokteillinn Espresso Martini hefur verið vinsæll frá því hann kom fyrst til sögunnar á kokteilasenunni á níunda áratugnum. Það var breski barþjónninn Dick Bradsell sem starfaði á Fred’s Club í London sem á heiðurinn af drykknum. Sagan segir að ofurfyrirsæta hafi pantað drykk „sem vekur mig og fokkar mér upp á sama tíma.“ Bradsell brást við og blandaði saman vodka, kaffilíkjör og espressó og nýr kokteill var fæddur.
