Forsáning í eldhúsglugganum  

Úti er frost. Birtan kemur seint og fer snemma, eins og gestur sem vill samt ekki trufla. Þó er eitthvað að gerast. Dagurinn lengist smám saman og einhvers staðar í líkamanum vaknar óþol. Maður fer að skoða fræpoka. Febrúar og mars eru nefnilega mánuðir forsáningar. Þá sá þolinmóðir garðeigendur fyrir blómum og matjurtum sem eiga varla nokkurn möguleika í stutta íslenska sumrinu nema að fá forskot. Það fæst í eldhúsglugganum, í litlum bökkum undir plastfilmu, þaðan sem vorið læðist hljóðlega af stað. Við skoðum hverju á að sá og hvenær, hvernig birta og hiti ráða för og hvað helst ætti