Eitt af því sem flestir tengja við jólin er maturinn og ilmurinn á aðfangadegi sem er svo lokkandi. Hefðir eru ríkur partur af jólahaldinu; hjá einhverjum eru engin jól án rjúpu, hjá öðrum er hamborgarhryggurinn ómissandi og hjá þeim þriðja er það graflaxinn… Jólin eru nefnilega hvergi eins, sumir eru nýjungagjarnir og elda eitthvað nýtt og framandi um hver jól á meðan aðrir halda fast í hefðir fjölskyldunnar sem móta jólahaldið hvert ár. Hins vegar leitast allir eftir því að gera vel við sig í mat og drykk um jólin og elda það sem þeim og fjölskyldunni þykir best. Samveran er það sem skiptir mestu máli en jólamaturinn er líka heilög stund í jólahaldinu. Í þessum þætti má finna klassískar hátíðarsteikur auk nýjunga sem allir ættu að geta notið þess að elda um hátíðarnar.
