Götubitahátíð í Reykjavík

Helgina 19. til 21. júlí verður Götubitahátíðin haldin hátíðleg í Hljómskálagarðinum. Gestir og gangandi geta gætt sér á götubita frá um 30 matvögnum en einnig verður besti götubiti Íslands valinn. Það verður nóg um að vera fyrir alla aldurshópa en auk matarvagna og sölubása verða hoppukastalar og leiktæki á staðnum fyrir börnin. Götubitahátíðin hefur verið haldin árlega síðan 2019 og er alþjóðleg hátíð haldin í samstarfi við Reykjavíkurborg og evrópsku götubitaverðlaunin European Street Food Awards.