Kaffibrennsla á Grundarfirði 

Í Grundarfirði er lítið, litríkt hús sem fangar augað. Þar má finna Kaffi Valeria, kaffihús og kaffibrennslu í eigu hjónanna Jan van Haas og Mörtu Magnúsdóttur. Kaffiilmurinn sem tekur á móti manni tengist kólumbísku kaffi, beint frá býli, sem Jan og Marta flytja inn og rista sjálf í aðalrými kaffihússins. Á Kaffi Valeria er hægt að setjast niður og njóta kaffibollans með heimalöguðu bakkelsi eða kaupa baunir til að taka með heim. Jan og Marta hafa lagt mikla alúð í að gera upp þetta litla hús og skapa litríkan kaffiheim, bæði fyrir Grundfirðinga og þá sem eiga leið hjá.