Nærmynd úr garðinum

Í miðbæ Reykjavíkur er lítill garður þar sem jarðarberjaplanta strýkur úr potti og bóndarósarvalmúi dulbýr sig sem salat. Kettir hverfisins, sem skeyta hvorki um eignarrétt né mannasiði, spóka sig þar um og öðru hverju lendir bolti í beði. Sú sem hlúir að garðinum, Maríanna Clara Lúthersdóttir, leikkona og bókmenntafræðingur, kærir sig kollótta enda er langt síðan hún tók þá ákvörðun að leyfa langlundargeðinu að ráða þar för. Hún ræktar blóm, runna og matjurtir, sultar og pikklar þegar þannig liggur við og svífur inn í núið við skrjáfið í laufunum. Árlega, á sjálfan þjóðhátíðardaginn, steikir hún líka pönnukökur í garðinum, eins