Sumt fólk virðist fæðast í þennan heim með aukaskammt af aðdráttarafli. Hvert sem það fer laðar það aðra að sér eins og sól í sólkerfi. Ragga Holm er ein af þessum manneskjum. Hún býr yfir einstökum sjarma og útgeislun sem lætur engan ósnortinn. Þó að lífið hafi ekki alltaf gefið henni bestu spilin þá hefur hún lært að spila þeim vel og sigrar hennar eru orðnir mun fleiri en töpin. Hún hefur snert á ýmsu á sinni viðburðaríku ævi; rekið skemmtistað, unnið sem kennari, stjórnað útvarpsþáttum og sinnt bústörfum.
Hún byrjaði ung að semja tónlist en það var ekki fyrr en hún gekk um þrítugt til liðs við rappsveitina Reykjavíkurdætur sem ferillinn fór á flug. Ragga varð fljótt í miklu uppáhaldi hjá aðdáendum sveitarinnar víðs vegar um heim enda lekur sjarminn af henni á sviðinu. Það sýndi sig kannski best í söngvakeppninni þegar húsmæður landsins féllu kylliflatar fyrir þessari gulklæddu Reykjavíkurdóttur sem kom stökkvandi út úr diskókúlu með hljóðnemann á lofti. En hver er Ragga Holm?
