Rjóminn þeyttur undir berum himni 

Það er fátt betra en að fá nýþeyttan rjóma út á ávexti sem steiktir hafa verið á opnum eldi í útilegunni. Það er lítið mál að þeyta rjómann úti en það þarf engin svakaleg tæki og tól. Það eina sem þarf er krukka og teskeið og svo auðvitað rjóminn. Setjið skeiðina ofan í krukkuna ásamt rjómanum, skrúfið lokið þétt á og hristið og hristið þar til rjóminn fer að stífna. Þetta tekur fremur stuttan tíma. Ef engin krukka er til taks má nota góða rennilásapoka en þá þarf að hrista fremur varlega og gott er að nota tvo til vara.