Í Hafnarfirðinum býr leik- og tónlistarkonan Rakel Björk ásamt manni sínum og ungri dóttur, þeim Garðari og Glóeyju. Eftir að hafa lagt stund á leiklistarnám í Listaháskóla Íslands debúteraði hún sem Fríða Hugljúfa í söngleiknum Matthildur á stóra sviði Borgarleikhússins, en þar starfaði hún áfram um árabil, meðal annars í söngleiknum 9 líf. Tónlist spilar veigamikið hlutverk í lífi Rakelar en hún er meðlimur í hljómsveitinni ÞAU ásamt manninum sínum, sem hún kynntist einmitt baksviðs í leikhúsinu. Hún hélt á vit nýrra ævintýra að fæðingarorlofi loknu, meðal annars til Danmerkur, en um þessar mundir leikur hún í söngleiknum Hver vill vera prinsessa? í Tjarnarbíó sem hún samdi ásamt samstarfskonum sínum í Raddbandinu.
