„Til mikils að vinna fyrir samfélagið allt að halda fólki virku og ánægðu á vinnumarkaði“ 

„Við höfum unnið lengi við mannauðsmál og kynntumst þegar við unnum saman á starfsmannasviði Háskóla Íslands um átta ára skeið. Við fundum fljótt að við áttum mjög gott með að vinna saman, höfum svipaða sýn í þessum málum og teljum okkur bæta hvor aðra upp.“ Þetta segja þær Guðrún Jóhanna Guðmundsdóttir og Hildur Halldórsdóttir sem reka fyrirtækið AUKI – mannauður og stjórnendaráðgjöf. Guðrún er menntuð í félagsfræði frá Háskóla Íslands og mannauðsstjórnun (e. Human Resource Management) frá University of Westminster. Hildur nam sálfræði og mannauðsstjórnun við Háskóla Íslands. Báðar eru þær markþjálfar og hafa lokið ýmsum námskeiðum sem viðkoma mannauðsstjórnun.