Thelma Björk Norðdahl og sonur hennar, Magnús Aldan Norðdahl, búa í fallegri íbúð í Kópavoginum, hún er 147 fermetrar að stærð í nýlega byggðu húsi. Thelma er búðareigandi og lýsir sér sem drífandi og skapandi manneskju. Þau fluttu inn í byrjun árs 2021 og segir hún skipulagið, lofthæðina og ekki síður umhverfið hafa ráðið úrslitum við kaupin á íbúðinni. Heimilið var komið í hátíðarbúning og settu ferskar og fallegar jólaskreytingar tóninn um leið og gengið var inn.
