Sóley Stefáns Sigrúnardóttir, stofnandi Heilsuhönnunar, segist vera í dag heilsuhönnuður en í gær grafískur hönnuður og á milli þessara daga hafi liðið nokkur ár.
Sóley fæddist á Akureyri en flutti ung til Reykjavíkur. Hún ólst upp í Mosfellssveitinni og segir það eiga líklega þátt í því hvað hún sé mikið náttúrubarn. „Upphaflega menntaði ég mig í guðfræði og kynjafræði en lærði svo grafíska hönnun. Í kjölfar heilsubresta fór ég að stunda jóga og varð jógakennari og í framhaldi af því fór ég í nám í heilsumarkþjálfun. Þetta vatt upp á sig og á vegferð minni að endurheimta heilsu mína bætti ég við mig öðru heilsutengdu námi. Meðal annars vinn ég með PRT-verkjaendurferlun (e. Pain Reprocessing Therapy) og kláraði einnig MA-diplómu í jákvæðri sálfræði.“
