Nú stendur yfir sýningin SUND í Hönnunarsafni Íslands en þar er farið yfir tímabilið frá sundvakningunni við upphaf 20. aldar til dagsins í dag. Baðmenning okkar Íslendinga hefur vakið athygli víða um heim og má segja að hafi mótað menningu okkar og samfélag. Fólk á öllum aldri, stærðum og gerðum hefur sameinast í ylvolgum laugum landsins nú í meira en öld en ótal svið hönnunar koma við sögu í sundlaugamenningunni hér á landi. Hönnunarsafnið fékk hönnuðina í Studio Allsber í samstarf við sig og eru þær nú með opna vinnustofu í safninu fram yfir HönnunarMars sem fer fram 4. – 8. maí.
